FIBA 3x3籃球世界盃喺2012年首次舉辦，喺上年開始先變成每年一度嘅大賽。可能大家會覺得美國喺奧運咁勁，就一定會派超強陣容打3x3世界盃；如果你咁諗就錯晒喇，因為美國從未喺3on3世界盃贏冠軍，而且今年出賽嘅四位選手都唔係職業球員。

USAB官網指出，任何人都有機會代表國家出戰3on3國際賽事，咁到底入選條件係乜？球員要由地區聯賽打起，每區嘅冠軍隊就可以出戰全國三人籃球賽；喺全國賽奪冠就得到為美國出賽嘅資格。

現年30歲、6呎3吋嘅摩亞（Craig Moore）係美國出戰今年3x3世界盃嘅成員之一，佢嘅正職係理財顧問，平時會着到西裝骨骨咁喺曼克頓返工，不過佢得閒嘅時候，就會落街場打3on3。其實摩亞就讀美國NCAA D1嘅西北大學時，就係球隊嘅三分王，佢仲話：「我第一次睇奧運，就係睇住Dream Team出戰1992年巴塞隆拿奧運。我兒時夢想就係着起國家隊波衫，參加奧運。」

FIBA 3x3籃球世界盃上周六喺法國正式開打，而美國隊除咗摩亞之外，仲有卡寧頓（Zahir Carrington）、賀夫文（Damon Huffman）同美拉迪斯（Daniel Mavraides）。不過佢哋喺男子D組打咗兩場，以12:19不敵荷蘭，但就以21:8大勝印尼；佢哋仲要新西蘭同南韓，爭取小組頭兩名出線八強。