韓國女團少女時代(少時)成員允兒，將於下月30號踏入28歲(韓國年齡29歲)，而佢喺噚晚播出嘅綜藝節目《孝利的民宿2》中就提到迎來29歲嘅真實心境。

允兒當時與同齡嘅男客人一齊洗碗，閒談時男客人表示：「我哋喺學校嘅話就係朋友，喺呢度就變成民宿職員同客人。」允兒就表示兩人可以好似朋友咁相處，隨後就感慨自己不知不覺已經就嚟29歲。被問到29歲最想做嘅事，允兒稱：「想要更加自由地過自己嘅生活，目標係擴闊非少時嘅允兒，而係普通人林允兒嘅生活。」

而噚日播出嘅內容亦提到，允兒與李孝利、李尚順喺休息時間時用Mic大展歌喉，將民宿變成K房，允兒仲唱到勁High，一連唱咗四首歌獨自High足30分鐘，展現出同平時唔同嘅一面，甚至被李孝利、李尚順夫婦嫌棄太嘈，場面好笑。

更多韓流，喺晒《娛果》
http://fb.com/appledailyent