由李鍾碩同韓孝珠等人主演嘅MBC劇集《W》題材新穎，所以一開播都有唔少劇迷被吸引而追劇，不過劇集不停穿越喺漫畫同現實世界，真係睇到劇迷頭都爆，而且劇迷往往都睇唔透編劇想點，真係分分鐘睇少集都唔明佢講乜。

據知編劇已經完成劇本，預計今個星期就會完成所有拍攝，不過劇組就一致保持沉默，絕不劇透！而劇集下周三就大結局，所以都引起唔少劇迷推測結局同劇情。

1.Happy Ending
劇迷最開心嘅當然係姜哲(李鍾碩飾)同吳妍珠(韓孝珠飾)可以開開心心咁一齊喇！就正如第13集中吳妍珠嘅幻想咁，漫畫《W》以國會議員韓哲浩(朴元相飾)入獄完結，姜哲去現實世界同吳妍珠生活，隨住時間流逝而同漫畫家吳成務(金義聖飾)嘅關係逐漸緩和，吳妍珠更介紹姜哲畀其媽咪認識，之後結婚，幾美好！

2.Sad Ending
有劇迷就表示雖然好多人希望Happy Ending，但按照劇情發展，勉強寫成Happy Ending反而會破壞咗成齣劇嘅完整性。有劇迷推測劇集可能會係Sad Ending，事關喺漢江發現嘅未知屍體！之前姜哲為完結漫畫《W》而跳橋自殺，及後吳妍珠去認屍時發現死者手上指住戒指而斷定對方不是姜哲，不過隨住劇情發展，兩人假結婚更戴上戒指，所以令劇迷推測《W》唔止講兩個世界(漫畫、現實)，更可能會穿越時間，即過去嘅吳妍珠發現於未來自殺嘅姜哲。

3.開放式Ending
有劇迷認為，按常理就係漫畫世界同現實世界無法相容，姜哲冇可能放棄漫畫世界中嘅人(如尹昭熙、徐道允)，而吳妍珠亦一樣冇可能進入放棄現實世界，從而進入漫畫世界生活，所以自然就係以Sad Ending作結。不過據編劇埋下嘅伏筆，姜哲可以通過意念召喚登場人物，即係佢都可以用呢個手段召喚吳妍珠，或者自己去返現實世界，之後會發生咩事就劇迷自行想像。如果劇情真係咁，咁漫畫《W》咪永遠都唔會完？