早排張兆輝同蔡瀚億(BabyJohn)、邵音音等人合作拍嘅恐怖電影、由杜玉貞做導演嘅《恐怖在線》，雖然喺香港就未正式上映，不過呢套戲就已經喺聖地牙哥嘅獨立電影節橫掃3獎，包括最佳電影獎、最佳女主角獎，而張兆輝更憑電影勇奪最佳男主角，認真威水。

張兆輝噚日喺廣州拍攝杜琪峯嘅新片時，就喺現場收到得獎通知，據知電影節仲會將獎項由聖地牙加嗰邊寄返嚟俾佢。

第一次拎男主角嘅張兆輝，就梗係相當興奮啦，佢就話：「真係估唔到套戲未上畫，就已經拎到獎，特別係拎到最佳男主角，對我嚟講真係好大鼓舞。」

佢仲話：「套戲能夠拎到3獎，証明香港電影係得到外界嘅認同！雖然呢套嘢低成本，不過我非常用心去拍，希望到時上映嗰陣，大家都多多支持！」

據了解頒獎禮將會於7月舉行，而《恐怖在線》預料會喺今年9月於香港上映。


【壹錘定音.李慧玲】6月4日正式開咪!

收聽方法:請留意【壹錘定音】facebook專頁
https://www.facebook.com/hammerout.hk