國際賽後英超喺周六重開，聯賽2連敗嘅阿仙奴將會喺主場迎戰般尼茅夫，亦係轉會窗關閉後嘅第一場比賽。領隊雲格喺周四召開賽前記招，話對走唔成嘅智利前鋒阿歷斯山齊士充滿信心，睇好佢可以喺兵工廠踢返出最高水準。

上輪聯賽作客0:4慘敗畀利物浦之後，阿仙奴掀起逃亡潮，據講山神都已經心灰意冷執定包袱，曼城轉會期限前亦開出6,000萬鎊向兵工廠斟介佢。點知最後都係變鬧劇，轉會冇成事。

雲格喺周四記招，少不免被問及山神嘅事，佢回應話：「我深信佢會極速回復佢嘅最高水準。轉會窗已經關閉，一切都已成定局，依家去講已經冇意思，湯馬士林馬最終留喺摩納哥；山齊士亦最終留隊，佢亦應集中喺阿仙奴眼前嘅比賽度。」

雲格喺記招亦不忘出絕招，轉移視線：「轉會窗關閉前發生嘅嘢，有啲的確令我覺得後悔，所以我相信係時候將限期定喺球季開始之前，球員心態不穩，對每一位領隊都係唔舒服嘅事。」

經過失敗嘅開季，失敗嘅轉會操作，山神仲會唔會好似雲格所講，嚟緊收拾心情全心全意為兵工廠搏命？相信球迷亦心裏有數。