張慧儀、徐子珊、錢國偉今日到香港遊艇會出席關於保護海鳥音樂劇小說「崗瓦納之約」捐贈儀式，幾位嘉賓同小說作者謝勤份屬好友，專登撐場支持，仲上台分享相識經過。

慧儀同子珊兩人同以貼身裙現身顯現S身形，張慧儀絕不遜色於子珊，身材仍然惹火，估唔到keep住S身材妙法係:「我冇刻意減肥，秘訣係朝早六點起身湊仔煮早餐再返學，之後去街市買餸再工作，再接仔放學返家煮飯，慢慢就瘦，依家keep住。」

慧儀分享時話好欣賞謝勤墨水，希望對方能合作出本書。慧儀又謂：「我諗法係，領養囝囝時唔係一個好健康小朋友，出書想留返俾自己睇過程同回憶。原本上年可開始，但各自忙又未落實，希望盡快啦。」慧儀下月將到大陸開劇，現時囝囝開始放暑假，稍後會帶兒子到內地開工，認為呢個係最好身教，能夠耳濡目染。

徐子珊則鼓勵好友出書，實現夢想。子珊謙稱寫嘢唔叻，暫冇出書打算，依家主力忙緊搞自己網上珠寶生意。

子珊簽咗王祖藍間公司後，自不然同老闆一樣愛國，稍後會主力喺大陸發展，下星期去北京影宣傳照、訪問等為打入國內巿場舖路。