擾攘咗一排嘅備兌認股證風波，終於喺上個禮拜露出平息嘅機會，傳聞更話最快會喺今個禮拜就有新輪推出。今次僵局得以化解，街外傳聞話係證監會應市場嘅要求，唔再要求發行商嘅交易董事，要對發輪時資料失實負上民事責任。
件事睇落好似係證監會肯作出讓步，而且重大發慈悲咁，不過韋衡從行家口中又聽到另一個版本，就係話班發行商原本死都唔肯接受喺任何情況下負上民事責任，只不過由於已經無發輪成半年有多，無收入又要捱打，加上周圍裁員聲四起，同埋證監會嘅威迫利誘，喺無辦法下惟有接收咗呢啲「喪權辱國」嘅不平等條約，而邊個係呢場仗嘅贏家，明眼人一睇就知喇。