今午（10日）沙田馬場國際賽日，最令人意想不到是年僅24歲的本港見習騎師巫顯東，高手林立下，截至頭六場的頭馬數字，竟然勁過「雙莫」莫雷拉及莫雅，成功起孖，成為本年度香港國際賽日首位兩捷騎師，真係唔俾個like佢都唔得！

巫顯東先於第二場勝出告東尼馬房12倍「英勇大師」，繼而在第六場二班草地1200米，以同屬告東尼旗下的15倍冷馬「華美之友」再下一城，個人首度與告東尼攜手起孖，告東尼徒弟蔡明紹，卻無法分得一杯羮。而「華美之友」組合獨贏A3派27.5元。

「華美之友」克服12檔，沿途守第五位，直路衝刺凌厲，以短馬頭位擊敗亞軍「駿明珍寶」掄元。「華美」系馬主陣營今季當旺，「華美之友」及「華美之寶」早前已分別由蔡明紹及莫雷拉勝出谷戰，如今以「華美之友」贏埋田草，馬主劉英華夫婦可謂功德圓滿。

第六場二至四名由三匹輕磅大冧巴馬包辦，順序為10號「駿明珍寶」、11號「京京千里」及14號「幸運美金」，四重彩派二萬八千幾，三T正獎有人中，每注派近370萬元。

當中「駿明珍寶」騎師杜利萊唔夠鑊氣，繼第五場騎「翩翩」不敵「紅衣醒神」屈居亞軍後，今場騎「駿明珍寶」再做阿二。