聖誕新年假期，除咗行街食自助餐，不妨去郊外賞吓花。近來係洋紫荊黃金開花期，佢哋係香港嘅代表花，又點可以錯過。

早前同香港專業教育學院應用科學系講師何家齊傾開，先知原來洋紫荊都有段故。洋紫荊開花期為11月至3月，係開得最燦爛同顏色最鮮艷嘅時候；但近年天氣反常，全年和暖嘅天氣令洋紫荊嘅花期長咗，市民遲啲可能有機會全年365日都睇到洋紫荊。

至於洋紫荊嘅由來，何講師話早係大約1880年時有個法國外方傳教會嘅神父無意中係薄扶林海傍發現，當時神父覺得洋紫荊顏色比紅花羊啼甲、宮粉羊啼甲更鮮艷，所以決定拎返修院種。何講師仲話，正正因為洋紫荊係香港被首度發現，又係本土隨處可見，所以成為市花！由於洋紫荊無種子，所以香港所有洋紫荊都係「嫁接」種出嚟嘅；甚至連世界各地好似大陸、台灣，只要有洋紫荊嘅地方，都係由香港洋紫荊母體嫁接再裁種。

可惜咁獨特的本土花種，回歸後，洋紫荊因為去殖化，「洋」字被故意省略，變成「紫荊花」，但事實上，洋紫荊同紫荊根本係兩種唔同嘅物種。

講到洋紫荊咁靚，費清都知道香港有幾個好正嘅地方欣賞洋紫荊。比如九龍寨城公園咁，入面有條洋紫荊徑，開滿晒洋紫荊；仲可以一邊欣賞入面嘅江南園林建築設計，一邊賞花。住係新界嘅朋友唔想去咁遠，都可以踩單車入大埔海濱公園睇洋紫荊。

費清＃要生計，也要生活＃毋忘初衷