聽鄧小平講故事 讚元帥爺爺有型
葉靜子名門所累哀歎嫁唔出

蘋果日報 2002/01/26 00:00


年僅二十六歲、已故中共元老葉劍英的孫女葉靜子,因與財爺梁錦松傳緋聞而為人熟識。出身顯赫家族的葉靜子,原來小時候已聽鄧小平說故事。雖然葉靜子與一般少女無異,都渴望一段甜蜜愛情,但因家庭背景的關係,葉靜子預言自己將獨身終老。 記者甘比澳洲專訪
父母放手任我行
現年二十六歲、已故中共元老葉劍英的孫女葉靜子,本月初以經理人身分,陪同中國跳水皇后伏明霞往澳洲兩星期,出席中澳建交三十周年的「旅遊之星」活動,前日二人剛返抵香港。日前葉靜子在澳洲接受了本報記者專訪。

「好多人尊重爺爺」
生為元帥葉劍英後人,葉靜子卻從未感到有壓力。靜子說:「其實我唔會有好大感覺,記得我十一歲時,爺爺先過身,以前細路仔都唔知爺爺有幾叻,只係知道好多人都好尊重爺爺,而我就覺得爺爺好有型,好有內涵,到大個睇番啲書,先知原來爺爺唔止有型,重係好叻、好叻嘅人。
「可能因為太細,爺爺冇教過我啲乜,反而做人方面,係我爹哋(葉劍英次子葉選寧)影響我最多。

美留學偷走返家
「我生長喺呢個家族,我只可以話覺得自己好幸運,因為我可以受到好好嘅教育,我可以細細個就見到好多真正嘅名人,例如鄧小平,我可以聽佢哋講古仔,講舊時嘅事,令我覺得好有趣,無形中識嘢多咗,因為佢哋嘅層次唔同,所以聽到佢哋講古仔,會令我有所領悟,真係好難得,亦係我覺得自己最幸運嘅地方。」
而一向予人乖乖女印象的葉靜子,原來亦有反叛的一面。
「好多人見我個樣好似好乖,其實我喺十幾歲時亦曾經反叛過,記得十三歲嗰年,我爹哋決定送我去美國寄宿,我當時好抗拒,喺女校十點半要熄晒燈瞓覺,你會唔會開心呀?於是我成日自己走去唐人街買機票偷走返屋企,但每次返到屋企,第二日就送番我返美國,嗰時開始反叛,覺得屋企好嚴,於是就你叫我行東,我就行西。
行事認真負責任
「但嗰段時間過咗一陣就好轉啦,因為上到大學,冇咁多限制,自己就自然會自動自覺修心養性,讀好啲書,爹哋佢講得冇錯㗎,佢成日話『自己條路,要自己行,我同媽咪可以陪你陪到幾大?我哋死咗之後,都係要你自己一個人行,做乜都要對自己負責任。』所以我𠵱家做自己鍾意做嘅事,都會好認真。」