今晚堪輿學家麥玲玲喺旺角花墟公園出席盆菜宴，講到近日吳綺莉(Elaine)涉嫌虐待女兒「小龍女」吳卓林，更在家中懷疑搜出大麻，麥玲玲今日挺身護友，自言同Elaine不時透過電話傾計:「佢搞畫展我都有去支持，其實佢絕對同個女好感情，當個女係朋友，交流得好好，今次可能係工作壓力，佢返嚟香港都想多啲工作做，上年佢啲工作有啲棘手，變咗個女會擔心佢。」

問玲玲姐Elaine係咪因為壓力大飲酒?佢話:「其實佢生活好健康，佢之前減肥做運動，食好少嘢，一磚豆腐同餅乾，又去衝浪，我諗幾樣嘢加埋，可能個女15歲，少少反叛期。」

麥玲玲再強調Elaine兩母女相依生活:「個女會好擔心媽咪，冇安全感，至於你話錫唔錫，佢哋感情好好，一定唔會打佢，所以聽到我好驚訝，不過學校又幾搞笑，老師聽到咁即報警送入醫院，係咪應該搵家長先?應該要有小小溝通，覺得老師做法搞鬼啲。」

問到Elaine有冇向佢請教風水?麥玲玲話:「佢係教徒嚟，有返教會，佢屋企附近有動土，可能有小小影響，佢咁堅強，冇嘢嘅，我成日都笑佢你喺街邊篤魚蛋都可以上頭條，新聞係多，但未必唔係好事囉。」