立法會今日開始審議高鐵一地兩檢條例草案，喺建制派人多蝦人少修改咗《議事規則》後，加上主席梁君彥強硬剪布，民主派要力挽狂瀾都有難度，難怪唔少建制派對兩周內通過草案，信心十足，甚至要食燒肉提早慶祝。

身兼一地兩檢條例草案委員會主席嘅新民黨主席葉劉淑儀同副主席、民建聯張國鈞，今日請記者食燒肉，葉劉形容呢個係「甩身燒肉」，慶祝身為委員會主席嘅佢，功成身退，之後就交俾梁君彥處理喎！

連委員會正副主席都要出手「勞軍」，政府又點可以乜都唔做？負責草案嘅運輸及房屋局今日都請議員同記者食砵仔糕等懷舊小食，相信都係答謝建制派坐定定作戰，運房局透露小食係特登喺石硤尾街市買嘅，山長水遠運去金鐘添馬艦㗎！

但葉劉眼見就唔多滿意，直指局方「出手低」，笑稱下星期要食LadyM，直言「運房局請得起喇！」。八方就此問過今日負責「送貨」嘅運房局政助符傳富，佢話下個星期先再算，而相信建制派或者政府無論送上乜美食都好，面對違憲嘅一地兩檢安排，唔少泛民議員食龍肉都覺得無味。

社福界邵家臻回應葉劉請食燒豬時直言，「我哋唔食葉太隻豬！」。但葉劉似乎介意自己隻豬冇泛民吼，佢話喎：「泛民唔敢食，我食埋泛民嗰份！」