麥明詩面對政治議題向來敢言，當選港姐之初，就被爆曾參予雨傘運動，當日佢喺Instagram寫上﹕「天下無不傘之筵席」，被封「人民民主女神」。

不過，今日有澳門讀者爆料，指麥明詩噚日為四太梁安琪率領嘅「澳門發展新連盟」站台，為17號舉行嘅澳門立法會選舉拉票。而該黨正是澳門一個建制派政治團體，麥明詩與首次出選、四太二仔何猷亨一齊站台，仲收咗支太陽花，但讀者就覺得麥明詩對澳門嘅立法會選舉認識唔多，亦唔了解四太過去喺澳門立法會嘅公職，所以對麥明詩好失望。

麥明詩今日回覆傳媒時否認撐建制派，純粹係支持好朋友，佢話﹕「我同猷亨認識咗好多年，人生第一次見佢咁努力同投入，好想鼓勵佢，其實我都唔知背後嘅政治立場，下次會小心啲。」《澳門日報》報道，現場介紹，麥明詩原來係何猷亨喺英國讀書時認識，仲係梁安琪幼女何超欣嘅補習老師，稱麥明詩係「路過」撐好友。據了解，麥明詩同猷亨雖然讀唔同嘅大學，但林作與猷亨既是中學同學，而在英國讀書嘅華人唔算多，大家都係當地寄宿，所以認識後會互相幫忙而成為好友。

而四太亦似乎都好鍾意呢位「十優港姐」，前年麥明詩同四太一齊出席活動，都硬要拉埋阿仔猷亨一齊合照，未知聲稱現在係單身嘅麥明詩同猷亨有冇機會發展呢？(相關新聞﹕ http://bit.ly/2gUdpIm )