睇吓比賽，寫吓稿，好快好快，又完成咗今次世錦賽採訪之旅。
今次採訪，同平日做NBA比賽嘅最大分別，就係見到更多來自世界各地嘅傳媒，好似安哥拉、卡塔爾同希臘都係其中之一。有時喺比賽之間，或者場波完咗後，我都會喺傳媒中心入面，同其他國家嘅記者把蕉言歡（你冇睇錯，因為大會有免費香蕉提供，大家工作時間又長，所以不時都會喺入面食兩隻醫肚）。

易建聯歲數被懷疑

除咗同中國及台灣傳媒，我亦都認識到幫FIBA寫expert'sblog嘅GeorgeEddy，原來之前明星賽同佢打過幾次波，佢每年仲會喺法國開班教人射波；仲有安哥拉電視台嘅記者（已經唔記得佢個名），佢喺球場入面不斷同人合照，好過癮！
外國記者知道我來自香港，經常都會問我關於中國隊嘅事；好似𠵱家爭緊大會最佳新人嘅易建聯，外國好多記者都唔信佢只得19歲。
咁又難怪，好似之前話17歲成為國手嘅陳江華，後來我問國內行家，原來佢係85年出世，只不過自己報細數，呢個亦都係公開嘅秘密；咁搞法，又點怪得外國傳媒信唔過易建聯呀？話唔定發現佢好似馬田斯咁，報細6年呀！