日本國民級組合SMAP年底解散，昔日風頭躉木村拓哉被指係令到SMAP不和嘅罪魁禍首，搞到木村喺圈中生人勿近，盛傳其擔演嘅TBS電視台明年1月新劇冇女星肯擔任女主角。

木村為新劇首次挑戰演醫生角色，有指綾瀨遙係女一首選，可惜被綾瀨遙方面婉拒後，連吉高由里子、石原聰美、長澤正美、北川景子、波瑠、滿島光等女星都聲稱冇期接演，早前有指喺《冰之驕子》曾拍木村嘅竹內結子都無緣演出，之後更指劇情要大幅修改，女主角好有可能改用台灣女星頂上。

至於今日出版嘅《週刊文春》又有新說法，爆料指竹內結子最終都會接拍木村新劇做女主角，其他陣容仲有松山研一、菜菜緒、木村文乃、淺野忠信等紅星，劇集安排於每周日晚上9時播出。