當年今日
關於我們

【李八方online】打鼓嶺有史上首位女鄉頭 猛人「牛哥」兒子統領大埔

蘋果日報 2019/03/21 17:04

陳金華陳月明打鼓嶺鄉委會林奕權鄉委會劉業強坪洋村

早前登報同阿仔陳崇輝脫離父子關係嘅陳金華,最終喺打鼓嶺坪洋村當選村長,相反阿仔就落敗成為「三失」,一次過冇得做村長、鄉委會主席兼北區區議會當然議員。而成功撼低阿仔後,有指陳金華擬向身為坪洋居民代表嘅阿女陳月明挑機,爭做打鼓嶺鄉委會主席,但今日結果卻大團圓結局,陳金華雖然有參選執委並當選,但冇力爭更上一層樓,陳月明最終無競爭下當選打鼓嶺鄉委會主席,係香港史上首位女鄉頭。
查實喺9個席位嘅執委會選舉中,陳金華同陳月明呢對父女檔都好高票,阿女以31票登榜首,老竇就以27票緊隨其後;之後改選正、副主席,早前話有意競逐主席嘅陳金華最終冇參選,由陳月明自動當選。陳金華之後同傳媒講,自己年紀大兼身體差,所以唔選主席,又大讚阿女能力高,對佢揸旗鄉委會相當高興。
新界人以前重男輕女,隨住時代改變,相信都減少咗呢種觀念,估唔到今年破天荒出咗女鄉頭。陳月明當選後向村民、叔伯兄弟say thank you,話多謝大家嘅信任同支持,仲話父親一直全力支持自己。其實陳月明同阿哥陳崇輝一樣,同樣喺英國留學同生活過,03年成為坪洋村首位女性村代表,佢老公張磊嘅老竇張整魁係深圳華僑城老總,背景絕對唔可以睇少。
有資深鄉紳就話,陳月明當選嘅意義,除咗係破天荒女性話事鄉委會,更體現咗中國傳統家天下嘅概念喺唔少鄉村仍然流行。即係點?即係陳金華唔選而支持阿女做一姐,至少keep住打鼓嶺鄉委會,仍然由陳家話事。
原來大埔鄉委會亦已改選領導層,一如八方之前所講,原有主席張學明退下火線,英國皇朝集團太子爺林奕權以唔夠40歲、極年輕之齡做咗話事人,首副主席同副主席分別係陳笑權同張國棟。林奕權老竇係人稱「牛哥」嘅鄉議局海外顧問委員會會長林道明,牛哥嘅「猛料」往績,過往傳媒報道都唔少,暫時未知牛仔林奕權有冇老竇咁打得?但呢位有財又有勢嘅年輕人,留學英國時帶領華人遊行捍衛南海主權,據知已令北京刮目相看。
雖然27鄉嘅鄉委會主席今年換上唔少新面孔,但於6月改選嘅新一屆鄉議局領導層,相信話事人變化唔大,預料劉業強會冧莊,繼續穩坐主席之位。劉業強就話無論係新人抑或舊人、男士抑或女士,希望新一屆鄉頭都繼往開來,以新思維續為新界人「戰鬥」,「就算選舉時有幾多恩怨,都要放低團結一致」。
八方問過39歲嘅林奕權,佢話多謝鄉紳支持,稍後會走訪大埔各鄉,聽下大家意見,睇下有乜要幫村民手。至於會唔會競逐鄉議局副主席?佢坦言會考慮,強調要睇下多唔多人支持先至再決定。
-------------------------
《蘋果動新聞》訂閱新世代,4月開始免費訂閱,現在接受登記!
http://bit.ly/2Ja3IXw
-------------------------
全港打工仔特約:Lun廚動腦Q
加開1:30pm
3月11至22日
星期一至五1:30pm 10:30pm
http://bit.ly/2IZA8Ef