男子組合MIRROR出道後，隨即吸納大批粉絲，每次現身公開場合，場面總是墟冚，受歡迎程度可媲美韓國男團。成軍一年，他們坦言所有事情都來得太快，以致有不足之處而被人抨擊，但是他們渾身正能量，從批評之中學習，感恩現有一切。

日前，Lokman（楊樂文）、Tiger（邱傲然）、Frankie（陳瑞輝）、Alton（王智德）、Stanley（邱士縉）、Jer （柳應廷）、Ian（陳卓賢）、Anson Lo（盧瀚霆）、Jeremy（李駿傑）、Edan（呂爵安） 和姜濤，在觀塘接受本報專訪，Anson Kong（江熚生）因拍劇而未能跟隊長細談這一年的感受。身為隊長的Lokman坦言帶領11位成員，背負住很大的責任，心情與狀態都是複雜，由於很多事情來得太快，令他有感難消化。姜濤指出道後，可能會覺得這一行很複雜，但幸有一班兄弟互相扶持，他說：「公司上下都好錫我哋，好多謝大家咁錫我哋呢個團體。」Jeremy開心地說：「我終於身處娛樂圈當中，好多嘢都嚟得好快，冇時間去諗自己做緊啲乜嘢，做完之後先發覺原來自己做咗一件人哋可能要花好多時間先可以做到嘅事，例如開演唱會、拍劇，原來自己做咗咁多嘢。」Stanley笑言能夠出道是一個不可思議的旅程和奇蹟。

Edan想起去年11月3日成軍之日，跟今天來說不是很遙遠的事，他說：「呢一年係我人生中嘅轉捩點，由素人變成偶像組合，有好多粉絲支持我哋，但我哋只係新人，所以要經常提醒自己係未夠好。」Tiger表示出道後一個月已舉行首個演唱會，他說：「對我嚟講邊度關我事㗎，但就真係開到，後來keep住出新歌，有啲成員又拍劇，所以我好感恩。」Anson Lo坦言很感激大家對MIRROR的包容，Ian表示：「我覺得好幸運，大家初初參加都冇諗過可以出到道，出道後會有咁多機會，包括出到自己嘅歌，又上過紅館呢個舞台，雖然呢一年好忙，但大家會一直警惕住，唔會每日重複一樣嘢，於是就麻木咗，雖然呢一年好似好急速，但大家都係樂在其中。」Jer說：「本身我跳舞唔叻，但出道咗一年，好多人話我係進步咗，我覺得觀眾係包容咗我哋好多嘢，所以喺呢一年都會做啲嘢去彌補自己不足。」

雖然有大家的包容，但亦遭到不少批評，Frankie認為好與不好的評論都是同樣重要，不過問到會否打擊自信心﹖他說：「本身我唔係好多自信，所以我之前比較少講嘢，但慢慢適應，過濾一啲嘢，轉化為力量。」但他笑指各成員曾經收到同一個的批評，Ian笑說：「其實係copy & paste，然後改過個名，我哋每個都收到，但係send咗Edan嗰封畀我，可能記錯咗我個名。」被其他成員指收到最多抨擊的Alton則說：「唔通我要耿耿於懷咩，雖然有抨擊，但都唔可以否定有支持嘅說話存在，其實最重要係心態。」

《全民造星II》監製兼經理人花姐（黃慧君）曾經講過，知道外界對MIRROR的演出有不少批評，決定下令讓他們再次參與《造星II》，Ian坦言當時的心情很矛盾，他說：「雖然有表演嘅機會，但又好擔心觀眾覺得我哋出道咗一年，對我哋嘅水平要求提高咗，所以當你做得特別好，佢哋覺得係應該，但你有少少失手就會扣分，所以都幾大壓力，加上我哋要兼顧其他工作，同《造星II》組員排練比較少，變咗唔可以準備到100分嘅表演。」Edan說：「第一下有少少驚訝，覺得有啲奇怪，有少少大蝦細嘅感覺，不過我都想返去玩，喺MIRROR呢一年，大家演出都係跳唱方面，發揮空間唔會好大，大部份時間都係12個一齊，再參與都係畀更加多嘅嘢大家睇，同埋我覺得花姐有佢嘅用意，如果我哋冇存在過《造星II》，觀眾就會好快忘記咗我哋第一季嘅人，會擔心會唔會因為新鮮感，啲人會留意咗《造星II》嗰班。」

面對由《造星II》參賽者投票的「MIRROR實力排行榜」，在首輪被投票為榜尾的Alton說：「影響狀態影響得好緊要，手都震埋，心理上係好唔舒服，喺想法上，我係理解，始終係一個節目，老實講，投票嗰啲只不過係嗰一堆參賽者，呢個結果只係代表咗嗰堆參賽者嘅想法，唔好畀自己鑽牛角尖，唔等於佢哋嘅想法唔重要，但亦都唔可以畀佢哋左右到自己嘅心態，不過真係有條刺㗎，花姐。」Ian坦言對排行榜雖然理解，但就不太認同，Stanley亦說：「第一次我係第11名，第二次係排第3，即使我拎咗第3，但我唔係特別開心，直情笑唔到，即係我拎第3，亦有兄弟拎第11，係會覺得心痛，但另一個私心就係自己有進步，同埋喺《造星II》面前，我哋好似受靶咁，嗰種感覺係難受。」

談及《造星II》將產生新一代偶像，會否擔心MIRROR地位受動搖？Edan說：「我唔知道公司會點樣處理，咁我估公司應該唔會整多隊男子組合嚟打自己。」Stanley問Edan：「如果有個成員入嚟取代你位置，你會點樣﹖」Edan笑說：「咁我最好唔好過ERROR，如果真係簽咗個別嘅參賽者，可能會另外發展，個定位會同我哋唔同，因為我哋始終係12個人嘅組合，所以又唔會存在好大嘅競爭。」

為了紀念成軍一周年，MIRROR錄製一首新歌《Reflection》，早前更到台灣拍攝MV，Jer說：「第一次12個成員一齊去旅行公幹，真係好開心嘅事，同埋見識多咗，又同當地嘅導演合作。」台灣向來美食多，當然吸引姜濤的注目，他笑說：「好食呀，有次我食多咗隻雞髀，原來隻雞髀係另一個飯盒嘅餸。」

採訪：黃曉妍
攝影：葉君海
攝錄：廖達燊
髮型：
Stone Cheng@PRIVATE i SALON
Lydia Yung@CHIC PRIVATE i SALON
化妝：
Rainbow Chung@Annie G Chan Makeup Centre
Cori Wong@Annie G Chan Makeup Centre
場地：The Wave觀塘