【本報訊】「如果當日我哋出院後聽屯門醫院指示只係等報告同覆診，我諗我老公脊骨已經斷咗……死咗或癱咗！」陳氏一家四口是小康之家，陳先生做物業管理、陳太做文職，夫妻辛勤工作並悉心培養兩名子女，55歲的陳先生為了健康及興趣，幾乎每星期踩單車。豈料病魔猝然而襲，陳先生若非緊急在私院做手術恐已癱瘓，夫婦怒斥斷錯症的屯院欠交代及解釋。

籌20萬元往私院切腫瘤

陳太稱丈夫因要緊急到私家醫院做手術切腫瘤，加上沒買醫療保險，要靠自己及親友籌集20萬元手術費。但陳太稱做手術前「根本冇考慮過錢嘅問題，因老公命只得一條，唔做手術可能會癱瘓……既然畀咗錢可保到條命，其他都唔重要！」面對龐大醫療開支，現時令兩人最苦惱的是日後應否返回涉斷錯症的屯院治療前列腺癌。
陳太稱最難以接受的是，屯院本月13日已完成驗血確認丈夫前列腺癌指數嚴重超標，但至16日竟仍未致電知會他們，若按屯院指示延至本月25日才覆診，丈夫恐早已癱瘓。陳太指長女在美國讀獸醫，夫婦訂機票5月去美國祝賀女兒畢業，慨嘆一場大病令計劃泡湯，兩人難免感失望。
■記者關英傑