喺日本有「賺錢之神」稱號嘅邱永漢，噚日接受《廣州日報》訪問，話中國股市仲會繼續漲，而H股更會升10倍㖭！喺噚日港股急跌過千點，投資者人心惶惶之際，邱股神咁講，相信令唔少投資者稍為放心。
邱股神話，「一年多前預計中國股市會升10倍，現時中國股市已經上升5倍，未來仍會繼續再漲。目前中國才剛起步，還不算泡沫，離泡沫經濟還有很遠很遠的路，H股會再有10倍的上漲，而A股市場，跌的時候就是買的機會。」

教你買邊個行業

雖然邱股神睇好後市，但佢亦提醒投資者要揀啱投資策略同股票，揀錯咗只會輸錢；而中國股市嘅泡沫時間越長，下調幅度越深，就好似日本股市咁，最高曾見39000點，但當泡沫爆破，就曾插落唔到8000點。
至於喺呢個波動市，投資者究竟買乜嘢股票呢？邱股神話，現時唔好掂金融同保險股，個人較睇好消費股、生物、製藥股，「雖然政府嚴格控制藥物價格，令藥物價格比較低，但相信製藥行業嘅業務會越來越大，而中國正逐步走向農業工業化，因此必會發展生物技術。」
點解邱永漢叫「賺錢之神」，因為佢喺50年代移居日本，做專欄作家時，推介嘅股票冇幾耐都升，咪贏得呢個美譽囉。不過，講到佢獨到嘅眼光，就梗要提喺六四事件後，睇準香港樓市下跌，人棄我取，一口氣買入600個單位，並喺97年樓市高峯期全部賣出，為佢帶嚟豐厚利潤。