福特FocusCosworth有望2006年登場

蘋果日報 2004/02/02 00:00


最近外國方面有消息傳出,指福特汽車現正密鑼緊鼓為Focus車系,研製更高層次嘅Cosworth版本,並有望於2006年初登場。
從預想圖中可以睇到,全新FocusCosworth係以三門掀背版本示人,另外廠方又為其換裝上全新車頭及車尾泵把連整流器、車身兩邊裙腳、大口徑跑車合金胎軨及尾定翼組合等等,令人一望而知佢係一部不可小覷嘅辣車;至於車廂方面,則暫時未有關於呢方面嘅資料,但一般相信車廂鋪排會以跑車化為主,當然跑車化座椅設計,更成不可或缺嘅組合啦!
引擎配搭方面,消息指新車極有可能會以一台2.0公升Turbo偈作動力核心,馬力輸出狠辣有勁之餘,FocusCosworth更會配用AWD四驅系統,路面循迹表現絕能予人十足信心。但一切仍有待廠方公布有關資料後,方可作實。
有興趣嘅車迷,不妨留意新車嘅確實推出日期喇!