鷹君（041）羅老太嘅孻仔啟瑞有位好靚嘅囡囡寶瑋（Natalie），有留意鷹君案嘅讀者應該唔陌生，但原來Natalie高大威猛嘅老公Jason Magnus都大有來頭，佢係長和（001）非執董麥理思（George Magnus）嘅囝囝，家陣從事緊物業投資及發展。

話說上周六啟瑞贊助咗一個圍繞「孝」字嘅徵文比賽，唔單止羅老太同啟瑞有出席，仲有啟瑞嘅孻仔俊桸（Curtis）、Natalie、同埋首次曝光嘅老公Jason，都一齊支持啟瑞去搞呢個活動，Jason同Natalie拍埋都好登對。

Jason老豆麥理思當年係「超人」李嘉誠嘅左右手，1980年已經做長實與和黃董事，2005年退休後轉任非執董，長實與和黃合併後就做長和非執董。

Jason喺哈佛大學讀東亞研究，2001畢業後喺內地發展，試過從事電影音樂原聲製作，之後成立公司，喺北京搞音樂節。近年佢做金融業，幫下屋企手，自己亦有間公司做物業投資。

至於孻仔Curtis原來仲喺香港讀緊書，明年就會去海外讀大學，佢話自己想喺文學與哲學方面發展，又想同做動畫製作嘅阿哥羅俊哲（Justin）雙劍合壁，一個諗劇本，一個畫動畫。啟瑞全部仔女咁生性，老豆應該好安慰。

全球樓行 Dream House零距離
https://hk.feature.appledaily.com/overseasproperty