23歲日本女星武井咲日前宣佈與EXILE主音TAKAHIRO奉子成婚，32歲嘅TAKAHIRO噚日終於婚後首次公開現身，為演出新片《HiGH＆LOW THE MOVIE2/END OF SKY》出席謝票活動。TAKAHIRO右手無名指戴有戒指，獲得台下粉絲送上祝福。

不過今次搞出人命，對武井咲嘅所屬Oscar事務所認真唔係好事，事關武井咲手執嘅10份廣告合約都受到影響，已有廣告商決定同佢解約，所有直至明年嘅已接工作，加加埋埋最壞打算要賠近10億日圓（約7,100萬港元）嘅違約金額。同時，武井咲主演劇集《黑革之手帖》要今個月底煞科，之後會就投入夥拍藤岡靛嘅10月新劇《我可以威脅你嗎？》嘅拍攝工作。原來武井咲已接明年1月開播嘅富士劇《Fragile》系列，由於呢套劇已在去年初播出第一季，由佢拍住長瀬智也、野村周平等合作，所以一定要起用原班人馬拍攝，屆時武井咲大住肚難以如期開鏡，令電視台十分頭痛。

同時，翻拍人氣漫畫、由佐藤健主演嘅真人版電影《浪客劍心》都由武井咲擔任女主角，片商本來打算明年籌拍新一集，武井咲奉子成婚亦令計劃隨時有變。