雷霆控衛韋斯卜克（Russell Westbrook）喺周一NBA頒獎禮獲頒常規賽MVP，可謂眾望所歸，自然會收到唔少祝賀，但以下呢兩個可能對佢別具意義。首先係「籃球之神」米高佐敦（Michael Jordan）向佢送上獨一無二嘅「飛人牌」XXXI-X-X波鞋套裝──咩叫XXXI-X-X？之唔係「31-10-10」，韋少今季常規賽做出嘅場均「大三元」31.6分、10.7籃板、10.4助攻囉！MJ仲送上一張簽名信鼓勵韋少：「恭喜，Russell。我一樣喺首隻冠軍指環之前攞到首次MVP…繼續努力！」

另一位就係去季離開雷霆轉投勇士、贏得總冠軍兼FMVP嘅前隊友杜蘭特（Kevin Durant），雖然兩人喺常規賽碰面時火花四濺，但昔日兄弟柏堅斯（Kendrick Perkins）上月透露兩人已經透過電話「破冰」，KD周二亦有透過YouTube頻道恭喜一眾得獎者，其中提到韋少時咁樣講：「我好幾年前已經講咗今年MVP係邊個，所以你要尊重我對球賽嘅了解lol 向韋斯卜克送上巨大祝福！佢步出球場猶如一個『NBA2K』創造出來嘅人物，超級屈機，實在要尊敬佢！」KD亦有安慰落選嘅好兄弟夏登，讚揚佢過去5年將球賽帶到另一層次，總有一日會成為MVP。