劉丹(丹爺)係劉愷威爸爸，但往往變成個仔嘅發言人，甚至變成磨心，多年嚟愷威同邊個拍拖，丹爺都會成為傳媒追訪目標，到之後愷威同楊冪結婚，婚後兩個人經常傳婚變，又或者係同邊個傳緋聞，丹爺都會不停被追問。

好似今年9月，劉愷威被大陸傳媒指疑似暗撻富家女Britney，由於當日丹爺突然缺席《愛．回家之開心速遞》中秋活動，一度引起懷疑以為丹爺要避開個仔同新抱婚變傳聞，後來傳媒打電話問番丹爺，佢好勞氣咁話：「真係多鬼餘！」佢仲解釋自己當日係有事出席唔到。

到咗大前日，丹爺同《愛·回家》演員出席冬至活動時，就話個仔劉愷威已經返咗香港，今次仲會喺香港逗留一段時間，佢指愷威話自己一路拍劇好辛苦，所以趁今次返香港會好好休息，丹爺話見到個仔咁樣自己都覺得心痛。而當日傳媒問丹爺佢新抱楊冪會唔會返香港時，丹爺話唔知，而問到佢想唔想一家人團年時，佢話咁多年都係咁上下，大家工作各有各忙，睇嚟丹爺真係有苦自己知。《蘋果》記者今日聯絡丹爺，想問佢個仔離婚一事，但未有回覆。