美聯儲聖誕前宣布加息四分一厘，係美國踏入加息周期後第5次加息，兩年共加1.25厘。相信大部份香港人最擔心嘅唔係要供多幾錢，而係樓價會唔會跌。就算市場預期出年美國或再加息3次，香港亦跟隨加息，筆者相信明年加息對香港樓價的影響不大。

過去半年新盤開售，投資客仍佔大多數，亦不乏半自用半投資的人，真正急需上車自住嘅人屬少數。只要來自大陸投資客源源不絕，樓價唔會因為少咗一啲掹車邊嘅人而冧市。自從習大大宣布「房子是用來住的，不是用來炒的」，內地一線城市即推樓市調控措施，壓一壓樓價，明年內地樓價難再開車，炒家自然來港尋找機會。所以香港新盤無論真偽豪宅，依然有價有市，買得幾千萬嘅豪宅，佢哋唔係太在意畀辣稅。

當然，如果可以唔使硬食三成辣稅就最好啦。身邊有從事地產業朋友話透露，最近多咗啲「新香港人」入市，有一定數量。呢到講嘅「新香港人」係指，喺香港剛住滿7年，攞到永久性居民身份證嘅人。

香港每年都會有幾萬人拎單程證來港，政府數據顯示，嚿年就有57,400內地新移民，即意味住每年都有幾萬人成為新香港人。雖然好多新移民都係住公屋，但唔代表佢地冇錢，啲錢放喺大陸，鬼知咩。如果新香港人加入炒樓行列，樓價只會有升無跌。亦唔排除佢地嘅內地親戚朋友為避稅，用佢地身份入市。

不過，加息對真正用家係有一定影響。如果你係靠發展商推出嘅什麼優惠，及超高成數按揭計劃，先勉強上到車嘅話，供多一千幾百都掹掹緊嘅話，上車要三思。

風吹知