隨着英冠周日煞科，3支來屆降落英甲嘅球隊亦塵埃落定，其中布力般流浪作客雖然以3:1勇挫賓福特，可惜來得太遲，皆因佢哋嘅護級對手諾定咸森林同伯明翰同日齊齊贏波，令布力般以46戰51分同森林同分，但得失球差輸兩球下僅排尾三，來屆要同韋根、洛達咸齊齊英甲見。

其實布力般喺22年前有過輝煌歷史，喺舒利亞同塞頓等領軍下稱霸英超，可惜呢朵昔日綻放嘅玫瑰，自2010年末由印度班主雲基接手後就每況愈下，當屆辭退艾拿迪斯換上堅恩領軍，亦成為球隊翌季降落英冠嘅導火線。近季屢見球迷喺伊活公園球場高舉「We want our Rovers back」嘅橫額，可惜事與願違，即使球隊季尾喺莫比利領軍下5場搶得11分依然返魂乏術，成為首支降落英甲嘅前英超冠軍球隊。