莫雷拉唔單止叫雷神，仲應該獲封谷草之神。今晚雷神由第三場開始直落三場騎咩都贏，勝出三匹難贏馬「大把世界」、「珍珠有利」同埋「神奇飛龍」，連勝五日橫掃13W，兼且保持個人在港出戰谷草未斷纜。當中單係2014年三次谷戰，佢已經贏咗九場，當中起孖、中三元同大四喜一應俱全，仲唔係谷中之神係乜？今晚更係雷神同徐雨石首度合作起孖，後者踏入新一年後所有頭馬由雷神一手包辦，其中「神奇飛龍」呢場氣走「自成一格」取得季內第二W，反觀「自成一格」今季卻依然守齋，連帶馬主范徐麗泰博士都要等馬年至有機會重溫久違嘅拉頭馬滋味。