四十七歲的莊金雄，飽受小腦萎縮症折騰，四肢活動能力日減，近年更無法自行操控手動輪椅，職業治療師建議他改用電動輪椅。惟雄叔家境清貧，無力掏出二萬多元購買電動輪椅，盼善長伸出援手。

對於行動不便的雄叔來說，上街的困難程度等同於登天。「冇屋企人幫我推輪椅，我根本邊度都去唔到，問題係佢哋都好忙，太太要搵食，兩個仔又要返學，唔得閒服侍我，我惟有成日坐喺屋企。」雄叔無奈地說。

手腳乏力寸步難行
十二年前，當時只有三十五歲的雄叔，突覺身體經常不由自主地搖晃，走路時無法行成直線，他求醫多時，最終證實患上小腦萎縮症。
「𠵱家回想起，應該係媽媽遺傳畀我，因為佢過身前都有呢啲病徵，只不過當時我哋唔知係乜嘢原因。」
雄叔自病發後，體力一直走下坡，由最初借助柺杖、輔助架步行，至今天，他已寸步難行，出入要坐輪椅。
「早幾年都冇咁差，但自從跌斷右腳膝頭哥韌帶之後，我就完全行唔到，呢三年都要坐輪椅。」
雄叔家裏只有一部手動輪椅，過往他可以勉強自行操控，但近大半年，雄叔健康情況再度轉差，雙臂乏力，現惟靠家人協助，他才可以踏出家門。