把孩子帶來世上，不是睇餸食飯，政府有誠意喎，好啦，響應一下特首生三個的施政，五折造人，生個半應酬吓咁。
造人左計右計當然行不通。但傳媒別有用心，訪問初生嬰兒的父母，從懷孕起，每個月使費若干，十個月人仔累積的支出，明碼實價。一條長命債計算下來，個個被訪父母都肉赤，於是正中傳媒圈套，開口叫政府減稅，向子女免稅額打主意，這樣才算是新聞。生仔當做免稅品，無孩子的家庭蠢蠢欲動，有孩子的家庭月結計數，認為生多個低風險，多生多扣稅。這樣的男人，有天照吓鏡，會進一步狂想，問老婆能否dutyfree？

經濟環境有改善，趕快樓換樓，參加豪華團外遊，喝8字頭的紅酒，家居百萬大裝修，兩公婆到歐洲大掃貨，拒絕再開萬事得出入寶馬七人車，寵物貓狗屋要是名牌，年尾封利是，考慮從廿蚊通脹到五十皮，良心終於發現，撥出股票獲利的萬份之一，加菲傭些少人工，捐錢給柬埔寨孤兒……逍遙的二人家庭，請繼續逍遙下去，別忽然心血來潮學人做父母。話之政府學台灣，生仔有錢派，堅決不落叠。自己知自己事，生仔負擔大，父母委曲求全，無論公司文化幾咁少爺仔和缺乏溝通，做人父母，左支右絀，點都要啞忍，試問點敢全體請假挺X或者搞逼宮鬧劇。婚姻像CEO，簽生約，約滿離場或者提早請辭都得。生仔是死約，走唔甩，俾個主席你做都有心無力。沉迷辦公室政治熱衷搞搞震的男人，無謂累人累己搞生仔這一瓣。個性出位忍不住係要搞嘢的話，大勢所趨，搞gay好了。