ViuTV的自家製劇集與綜藝節目大膽創新，最近他們的直播綜藝節目《埋嚟睇 埋嚟玩》以吃喝玩樂情報、奇人趣事，每集派錢作賣點，由伍詠薇（伍姑娘）率領4位年輕人朱晉傑（CK）、余逸思（Yoshi）、王頌茵（Kathy仔）與曾贊學（阿神）主持，節目播出近兩星期，有搞笑的伍姑娘坐鎮，估不到卻負評連連，伍姑娘被指轉數慢、與Do姐的節目比較下顯得失色、節目沒有定位、主持不能帶動氣氛等等。

日前，伍姑娘帶着4位主持出來「拆彈」，伍姑娘更以湊仔來形容跟4位年輕人的相處，大家打成一片，伍姑娘說：「佢哋4個其實好幸運，喺另外啲電視台未必可以咁輕鬆，幕後人員包括我都好似湊仔女咁湊你哋，湊仔真係好辛苦！不過佢哋唔使湊，我以前喺戲劇組，一唔得就即刻俾人鬧，你會好唔舒服，今次咁樣，我只會話佢哋係好幸福，公司會開個live半小時，我又能遇到你哋，覺得係好好嘅訓練，公司咁錫你就應該勤力啲，有時真係僧多粥少，我都係一個新人嚟，大家要不斷學習、不斷改進，迴響係點樣都好，show must go on，一定要做到最好，最緊要大家開心。」

被網民批評做得比Do姐差，伍姑娘笑指跟Do姐冇得比，她說：「ViuTV始終唔夠TVB嘅歷史，每間公司set up都唔同、簽嘅人唔同、訓練又唔同。好多謝大家將我哋同Do姐嘅節目比較，有聲音好過冇聲音，冇聲音即係拍烏蠅，冇人講係悲劇嚟嘅。第一日做完節目，已經自己開live等大家直接同我講，我係好humble，唔係只係聽好嘢，要接受批評，希望有改善。我都識Do姐同農夫佢哋，佢哋係一個錄影節目，同埋都係估啲嘢、睇片，甚至阿Bob或者呀姐嘅節目，係完全唔同嘢嚟，我真係覺得唔似Do姐嘅，佢哋唔係live，我哋初頭都要磨合，我好多謝大家咁比較，我哋一路有改進，就好似第一、二日要即時接電話然後選出4位得獎者，但電話有成萬個，發現咁做係唔得，製作即時作出改進，點知咁就話我EQ低，我做咗替死鬼去做呢件事，不過唔緊要，呢啲批評令到我哋可以成長，成件事係進步緊。」

首次擔正當直播節目主持，會否難倒伍姑娘？她說：「我都係同步學習，我做咗30幾年娛樂圈，喺戲劇組多，但綜藝都做過大騷司儀、主持節目乜都做過，但唔係主力，我唔係年年做咁training法，同埋今次係做半粒鐘嘅live show，我都係新人，同埋佢哋都係新人，係唔同年紀嘅新人，大家都學習中，係有壓力嘅，係一個好大嘅挑戰。無論幾多歲，永遠有個好奇心，就會進步，我亦都喺年輕人身上學到嘢，係互相學習，係正能量嘅。我好有信心代表大家講，呢個節目睇落去會習慣、舒服同開心，希望大家歡樂正能量。」

訪問當日，伍姑娘十分照顧4個「仔女」，提到跟表面惡形惡相的伍姑娘合作，原來人人也感到膽怯，CK說：「有前輩咁易相處，又肯同你一齊玩，唔係必然嘅，真係好慶幸遇到伍姑娘，加埋玩得，當自己做紅館演唱會，大家估唔我哋有幾辛苦，10點半live，每日都會中午就返公司準備，差啲想喺九龍灣租間酒店。」Yoshi則謂：「一開始會驚，伍姑娘唔笑嘅時候有啲惡嘅，但係off cam之後都會好鼓勵，有時見到網民嘅評語，一定有少少唔開心，佢每次都好鼓勵我哋，叫我哋頂住！」

Kathy仔指節目重點是在疫情下令大家開心，在外國拍些有趣的影片跟觀眾分享，派錢則是要鼓勵大家，令大家開心，CK說：「過往嗰半年，大家都囤積咗一團好大好大嘅負能量喺自己身上，睇到一個電視節目，就算好笑唔好笑，都係一個宣洩嘅出口，嗰半個鐘都係娛樂大家。」

採訪：羅慧敏
攝影：沈健程
攝錄：馮嘉銘
化妝：miss 5 studio（伍詠薇）
髮型：HAiR（伍詠薇）

-----------------------------
第三屆最港電影大獎
按此立即投票
-----------------------------
【武漢肺炎】專頁
全民自救 抗疫資訊盡在《蘋果》