李局長為咗副學士問題，大動肝火，與陳校長大打筆戰。罵戰會傷脾胃，本身係大國手嘅李局長能言善辯，如果陳校長願意與李局長上電視或電台辯論，用粵語或英語，左丁山一定買李局長贏，用英文嘅話，重可以讓一球㖭。
辯論梗係唔會啦，你估呢度係美國咩，乜事都可以搵到真係有料嘅專家上電視台辯論一番。李局長慳番啖氣，憑佢大面子，請咗好多商界人物，坐滿港麗酒店宴會廳，其中包括一啲重量級人馬，聽教統局推銷副學士，即席請各位商界嘉賓捐錢或捐助其他公司資源，支持副學士課程及「商校合作計劃」。有咁多大孖沙親自到場捧副學士課程，教統局夠晒菲士，有時做大官真係要靠吓背景（家族、地位、學術成就）先至好辦事嘅。

議員蘇菲對商校合作，扶植學生，最為熱心，兼且有話直說，居然在台上話港麗酒店嘅餐飲部，設計唔掂，塊餐巾得個靚字，與枱布一樣顏色質料，但唔索水，唔方便抹嘴，睇得唔用得。蘇菲係紡織專家，自然識得種種不同布料之特質，故此彈無虛發。在座人士聽完，個個大笑，連港麗酒店大業主黃公子，亦笑埋一份。不過聽過往兩位高官楊生梁生嘅經驗，黃公子對部下甚嚴，港麗酒店嘅管理公司唔知會唔會已經就收咗黃公子垂注嘅電話呢？
副學士係有得搞嘅，一啲職位唔需要大學畢業生，但中五中七生又缺乏相關訓練，於是由副學士做就啱啱好。現在副學士課程有好多學校（主要係與大學有關連機構）提供，充份發揮市場主導作用，就住商界需要而開辦，冇人讀嘅，就唔會開，長期嚟講，副學士課程有助提升整體人力資源，減少結構性失業，好值得商界支持。大經濟學家GaryBecker（見《金融時報》六月十七日）話佢三十歲之前（佢今年七十五歲），到美國經濟學會發表人力資源（humancapital）理論，幾乎俾人趕落台，𠵱家有邊個唔講？有人讀副學士，十分符合貝加嘅理論。