上市公司醒畀小股東嘅心意，唔係次次都對股東有益，好似前嗰排東亞銀行（023）公佈業績，盈利大倒退，之前有啲證券行估佢唔會派息，但可能係90周年大日子，上市公司即使面對艱難嘅經營環境，仍然派兩仙股息畀小股東。不過，佢冇諗到，對於啲揸貨唔多嘅散戶嚟講，真係「多謝夾盛惠」！
原因係一手東亞200股，即係揸一手收到4蚊息，一般股票行代客收息起碼收30蚊手續費，即係話除非你將啲股票轉晒喺自己名下，否則放喺銀行或者股票行，諗住長揸又得，短炒又得嘅話，冇8手喺手，唔止冇息收，仲連手續費都蝕埋。咁派息，真係唔派好過。

收息唔夠畀手續費

其實，講開上市公司「好心益唔到散戶」嘅例子，敏妮都有親身經歷。話說敏妮有一隻坐咗艇好耐嘅股票，之前突然大幅反彈，雖然仍未返到家鄉，但敏妮喺佢身上嘥咗唔少時間，浪費咗好多機會成本，亦深信呢次應該係難得嘅跳船機會，所以終於放手，叫經紀H幫敏妮沽清手上呢隻股。
諗住已經同呢隻股劃清界線，點知前幾日經紀H打電話嚟，「喂，敏妮，你隻艇股，送紅股呀。」敏妮即時反應係，「咁又點，敏妮都冇揸呢隻股咯，你唔係打電話嚟話當日未沽晒吓嘩！」
點知經紀H話：「你啱啱趕得切收埋紅股先沽。」大家千祈唔使恭喜敏妮，因為經紀H話，敏妮收到嘅紅股，即使全部沽出，賺埋都唔夠畀股票行嘅手續費，經紀H打電話嚟係叫敏妮畀錢，佢仲話：「敏妮，睇怕你同隻股塵緣未了噃。」
睇怕係孽緣囉！

溫敏妮
http://wanmanli.com/blogs/