【新增動新聞】

保羅普巴破世界紀錄轉會可疑交易，曼聯甩身！曼聯中場普巴去年夏天以破世界紀錄轉會費8,900萬鎊由祖雲達斯加盟曼聯，但有關交易於今年5月被德國《明鏡周刊》記者撰寫書籍《足球解密：骯髒的足球商業》披露，普巴經理人拉奧拿從中獲得高達4,100萬鎊收入，懷疑涉及球員「第三方擁有權」，國際足協（FIFA）其後亦證實展開調查，並要求兩間涉事球會解釋。不過，FIFA發言人周二證實：「我們能夠確認，未有對曼聯展開紀律訴訟。我們亦能夠確認，已經對祖雲達斯展開紀律訴訟，但唔會作進一步評論。」

講開普巴，佢周一完成喺香港嘅公開活動後亦已結束大中華之行，返番歐洲繼續放暑假，難得到此一遊當然要喺instagram開心share，先post咗段喺中國打波嘅片，上籃、封阻、三分一樣有板有眼，運動才能爆晒燈！原來24歲嘅佢同樣童心未泯，靜雞雞走去香港迪士尼同米奇、米妮見面，仲嘗試做「小三」撬米奇牆腳，攞戒指向米妮求婚，可惜佢哋打風都打唔甩，普巴唯有「葡萄」講句：「最少我試過！」