何韻詩曾經多次為香港政治議題發表個人意見，到最後主動俾大陸封殺，呢啲舉動，原來唔只香港人見到，連英國廣播公司（BBC）都覺得阿詩喺呢個年代，留低咗一定影響力。

今日BBC喺網站公佈咗2016年全球百大女性，阿詩成為咗其中一份子，BBC將阿詩歸類喺「政治」類別，形容阿詩為民主運動家，阿詩敢言作風得到大眾欣賞，但同時亦得罪了中國的共產統治者。

BBC又引述咗阿詩金句：「Do not say you have no choice. Everyone has a choice.（別說自己沒有選擇，每個人都有選擇。）」

另一個有份入選嘅就係香港東方足球隊教練陳婉婷（牛丸），以全球首位女教練身份帶領男子足球隊獲得頂級聯賽球隊冠軍而入選。

入選全球百大女性之中，亦不乏其他地方嘅知名人士，包括：

中國女權人士鄭楚然：因積極倡導反性騷擾、反性侵、反歧視等公開活動而遭拘捕，目前佢正為「Pride Planning」工作，組織女權運動。

「iHomo App」創辦人歐小白：同樣嚟自中國，本身係女同志嘅佢，希望透過App撮合同志形式婚姻，以助他們瞞過家人，可以過自己嘅理想生活。

日本著名歌舞伎演員市川海老藏太太小林麻央：今年驚爆患乳癌第4期，佢積極樂觀接受治療，仲開blog寫抗癌經過。

大碼英國模特兒勞倫斯（Iskra Lawrence）：曾經上載堅持「不改圖」嘅照片到社交網站，呼籲大家學懂愛自己。

白蝕超模哈洛（Winnie Harlow）：自小因白蝕症受到欺負，但無氣餒，將自己的獨特外表變成優勢，成為著名模特兒。

美國女歌手Alicia Keys：屬唱作女歌手贏過15個格林美獎項，屬現今最出色嘅R&B歌手之一。

印度前三級片女星Sunny Leone：自從良後反而愈撈愈掂，唔單止喺寶萊塢（Bollywood）拍過幾部電影，仲從商做生意，早前仲做才女出書。