張衞健（Dicky）同老婆張茜前晚盛裝出席喺尖沙嘴舉行嘅有線娛樂新聞台5周年生日晚宴，當傳媒稱呼佢哋張生張太時，佢哋表現得好開心，反而當司儀喺台上叫佢哋做Dicky同張茜時，Dicky主動話：「不如叫我哋張生張太。」張茜都話：「由我張太公佈九位入選主播嘅名單。」
有主播問張茜收過乜嘢難忘嘅生日禮物？Dicky搶住話：「乖，答啦，有老公喺度。」張茜先至甜絲絲咁話，每年生日無論Dicky係咪喺佢身邊，都會收到佢送嘅玫瑰花。

揀婚紗懊惱

Dicky透露下個月會返香港出席好朋友羅慧娟嘅婚宴，講到喺不丹完婚嘅梁朝偉同劉嘉玲返香港之後都會補擺酒，問幾時輪到佢哋？Dicky話：「近來唔忙，會認真諗補擺酒嘅安排，不過唔一定喺香港。」張茜就話：「北京會係首選，我想行教堂，搵間靚教堂舉行。」會唔會效法梁朝偉同劉嘉玲去遙遠嘅地方避追訪？Dicky話：「咁又唔使，偉仔係佛教徒，我哋係天主教。」張茜跟住話：「一定同大家講，大家可以嚟影。」
張茜又透露仲未影結婚相，佢話考慮行禮當日先至影。至於婚紗款式，佢話：「諗到頭都大晒，唔知自己訂好，定係搵人設計。」Dicky笑住話自己設計平啲，張茜即刻話：「我會慳。」Dicky聽到老婆咁體貼，佢忍唔住話：「唔緊要啦，你咁細粒用到幾多布呀。」