金融海嘯投資銀行界首當其衝，裁員減薪不絕於耳。從事投資銀行工作13年的梁維君（Angela），雖然早於07年中股市興旺時已轉行，開其樓上餐廳，但依然受金融海嘯冲擊，因食客減少而蝕錢。佢笑言：「𠵱家每日中午返嚟，睇吓多唔多客取消booking，已經知道嗰日個市升定跌。」
轉行前，Angela喺金榜融資做到資本市場部董事總經理。佢想當年話最好景係97年，淨係花紅已經等於3年薪金，但追deal（交易）、8日去10個國家做路演、同客戶周旋等工作壓力，實在不足為外人道，加上覺得做投行其實冇專長，所以一直希望轉行。

98年曾開私房菜

Angela唔係飲食業初哥，98年玩票性質投資第一代私房菜，之後又投資西餐廳，前年成功報讀一個管理中菜館嘅課程後，毅然轉行，一擲200萬喺上環開樓上fusion餐館「twyst」，做全職老闆。
「收到信話收我讀個課程時，我仲喺英國做緊路演，即刻打電話返香港，向老闆辭職。」認真有型！不過一開始就撞板。
一間餐廳大廚最重要。佢喺洲際酒店請咗5個師傅幫手打理餐廳。以為有品質保證，點知大酒店同小餐廳廚房運作完全唔同，酒店大廚只負責做菜，設計菜式同採購食材由其他人處理，小餐館嘅大廚就要萬能。
「當時位大廚淨係識煮，結果我要幫手買餸，其他嘅嘢都要我理！」佢苦苦支撐一個月後，炒咗5個師傅，重組班底，幾個月後，餐廳終於有錢賺，成績理想。

海嘯殺到餐廳蝕錢

不過，金融海嘯舊年9月殺到，直接影響中環客源。Angela坦言10至11月客量明顯減少，要蝕錢。好彩12個月有聖誕節撐住，恢復盈利。
雖然經濟同生意前景唔明朗，但佢一啲都唔悲觀，仲打算主動出擊，「以前多數靠口碑，09年打算設計個網站，利用電郵做多啲推廣，希望留住一班熟客。」
Angela話：「最近見到舊同事，個樣好愁。如果𠵱家我仲做緊投行，可能好大壓力，唔係我要炒人，就係要俾人炒！」佢慶幸自己離開呢個壓力圈，發展另一個事業，仲打算學做甜品，多一門技能。

李華華
mailto:[email protected]