本年高爾夫球第二項大滿貫美國公開賽，周五繼續喺Erin Hills上演第二日賽事，仲颳起超級冷風：世界排名前3球手德斯汀莊遜、麥艾萊同戴爾竟然齊齊make唔到cut，無緣最後兩日賽事，更加創下自1986年正式設立世界排名後，首次大滿貫出現世界前3球手齊齊miss cut嘅場面！

麥艾萊同戴爾呢日成為playing partner拍住上，點知變咗「攬炒」，其中麥艾萊呢日喺最後6洞力挽狂瀾打出4隻「小鳥」，全日造出低標一桿嘅71，可惜首日表現太差，兩日合計以高標5桿嘅149出局；至於戴爾表現更差，兩日打出高標10桿嘅154同樣止步。至於稍後出場嘅一哥德斯汀莊遜同樣失色，呢日只係打出平標準72桿，合計以高標3桿嘅148出局。目前有4位球手以低標7桿嘅137並列榜首，包括卡斯、高普卡、夏文同費列治。