「毛記」母企「毛記葵涌有限公司」之名今日遞交上市申請，擬於主板上市，換句說話嚟講即係「腦細」林日曦(原名徐家豪)、陳強(原名陸家俊)、阿Bu(姚家豪)三位即將升呢做上市公司老闆。《蘋果》就搵嚟「腦細」回應，不過佢就短訊回覆話：「不好意思，現階段未能回應！」

呢份上市申請文件，披露了《100毛》業務狀況，2016年財政年度(截至2016年3月31日)收入達5,482萬元，毛利3,633萬元；至於2017年財政年度收入，除稅後利潤達3,626萬元。

「毛記葵涌」主要收入為數碼媒體業務，去年度佔近8成，印刷媒體則帶來1成收入，其餘1成為藝員管理及活動策劃。而文件中亦披露，「毛記」由「印刷媒體」轉營至「數碼媒體」。其中「印刷媒體」由2015年佔收入百份比9成9延年遞減至1成，而「數碼媒體」由2016年開始佔收入近52%，至2017年增至約72%。

文件亦顯示，本月12日，黑紙派2,200萬元特別股息俾股東。

「腦細」就話上市單嘢唔講得住，咁東方昇點睇呢？佢以短訊回覆：「我都唔清楚呀，我作為小員工，只係關心公司上市，係咪會有錢分？有得加人工㗎？定係工作量會增加，我要OT呀？」

咁一眾「真 ‧ 老闆」(即係讀者同網民)又點睇呢？

有網民就話：「上咗市，係咪仲可以咁「順灘」諷刺時弊呀！？」、「一上市就好難自主，會變質。」似乎對於「毛記」上市態度謹慎。

亦有網民抽得就抽：「元秋口中的雜誌仔要上市了.....」（詳見： http://bit.ly/2h2L5XP )、「毛記葵涌, 係咪惡搞和記黃埔XD」