爵士今日，吉時九點，將會在北京正式接受壽爺點化，跟住就露滴牡丹開，特區正式進入新時代嘞！
爵士在冊封之後，未敢怠慢，發表謝恩宣言，跟住嗱嗱臨回港即時開工，講到強政勵治，福為民開，又有邊個好似爵士咁搏老命！
跟住就係改組行會，將十一局踢出，另外每局再攝件政務助理，實行大改革、大洗牌、大封官！
政務助理問題，爵士好熱心！不過，諗深一層，十一局位位猛人，由太子章至冬姑，有頭有面，下面跟開個常秘，本來合作無間，突然集體被掃出行政會，冇晒飛屎，經已一肚火！

局長有辱無榮

點知，重要打橫插一件民建聯見習生入嚟，騎住晒啲政務官，月薪十萬銀！身為局長，冇得自己揀助理，而係由爵士代為物色，呀唔係，係曾鈺成代為挑選，協助各局局長施政，啲局長嘅自尊心有乜感受，咁就唔知嘞！
爵士又話，佢將會只主管大方向，各局事務，由局長自己由頭跟到尾喎！咁即是話：件政務助理，係人係鬼，係正貨定係生銹，盲婚啞嫁，局長各安天命，有鑊就梗係自己孭（因為人哋只係「助理」，又後生，點樣同你分擔責任呢），不過有經驗就一定要同佢分享，本事要教足，料要畀足，貨要交足！只有辱，沒有榮嘅，睇嚟好似變咗李國章、廖冬姑同埋羅范椒芬佢哋喎！
八方諗諗吓，覺得既然香港人天生好似欠咗民建聯，政務助理都好應該設立，由愛國愛港黨獨家包辦，既然佢哋二十年來都一事無成，等佢哋吸啜住個公務員體系，學吓由肥彭英國佬一手培養嘅公務員管治（雖然七年來，公務員亦俾佢哋彈到葉都落埋），或者會快高長大！自由黨同民主派當然冇份，因為民主派「裏通外國」，而自由黨，因有田少二十三條抽身反政府紀錄，個阿頭都養唔熟，何況佢啲見習口靚？
所以爵士回港，第一時間好快啲同曾經講過要閉門揀特首嘅民建聯召開高峯會，快啲決定點樣成立一個由「民建權」新政府喇！

傳真︰2623-9278
電郵︰[email protected]