韓國樂壇盛事《KBS歌謠大戰》今晚於首爾舉行，由男團EXO成員燦烈、防彈少年團(BTS)成員Jin及女團TWICE成員多賢擔任主持人，據悉出席是次盛事嘅歌手多達30組，場面墟冚。

一眾歌手率先亮相紅地毯環節，雖然現時韓國天氣寒冷，不過AOA、GFriend、MOMOLAND等女團都捱冷晒腿示人，女團OH MY GIRL有別於其他人嘅黑白風格，7位成員都穿上華麗服飾，化身公主，吸引眼球，不過成員YooA條裙就好短，搞到佢上樓梯時險走光。至於男團GOT7成員Mark因腳傷缺席盛會，導致組合六缺一現身，而成員BamBam用泰文向海外粉絲打招呼後，香港成員Jackson亦即場用韓文、中文及英文向各地歌迷問好，大晒語言天份。

而擁有一雙長腿嘅女歌手宣美，行紅地毯時就收起長腿，反而大晒玉背。女團A Pink成員娜恩就穿上極短吊帶小背心蒲頭，相當性感，不過佢鞠躬致謝時就用手遮住心口，避免走光。人氣男團EXO及女團TWICE緊接現身，而BTS就壓軸登場。

精選韓流，喺晒《娛果》
http://fb.com/appledailyent