當年今日
關於我們

林基事但噏:我為巴士迷感到羞恥

蘋果日報 2006/05/27 00:00


做咗接近20年巴士迷的我,你叫我家陣仲拎住部相機通街走去影巴士,我諗真係有啲難度,除咗因為興趣減退之外,最重要係現今新一代巴士迷簡直可以用「失禮街坊」去形容,點解?答案好簡單,倘若巴士線突然間有新車出現,又或者話要取消的話,你就會發覺沿途都有人揸住部相機對住你搭緊嗰部巴士,乖乖的會站在行人路上慢慢影,或開車去跟,但是一班瘋狂的,就會二話不說衝出馬路,站在分隔行車線的石壆上影。
我記得有一次在九龍城碼頭泊好部車同朋友去食飯,恰巧那天某條巴士線有一部新車行走,當時車未到已人山人海,車到後更恐怖,在站內或剛在那部巴士下車的巴士迷,突然以9秒9的速度跑去車站影相,但無顧及後面有無人或車,若果你阻住影相佢仲會隨時用粗口鬧你,話你好阻住佢,簡直恐怖!
諗起以前,大部份巴士迷跟一班巴士司機的關係不錯,就算影相都唔會有人理,甚至班司機都會行過嚟大家一齊傾偈,家陣想有咁嘅情況都幾難,據聞連巴士公司聽到巴士迷呢3個字都驚,唉!睇怕日後都係唔好認自己係巴士迷,免得被標籤為不守法的一群!

記者:鄭達基