俗語有話怕老婆會發達，係真定假真係冇人知。不過韓國娛樂圈都有唔少愛妻號，佢哋深明老婆嘅一切，所以成功避過唔少爭執，咁樣算唔算係御妻之道呢？

講緊嘅係近日宣傳韓片《偵探:歸來》嘅51歲成東日同埋41歲嘅權相佑，佢哋近日上咗節目《人生酒館》，喺節目中就大談同妻子相處之道，當中成東日就教路點樣防止老婆嘮叨，仲喺現場話超簡單，搞到現場個個人夫都好想知道答案，連權權都即時睁大雙眼想知秘訣，最終成東日只簡單講咗句：「再多賺點錢就得。」現場人夫都即時拍手表示認同。

至於權權呢都有佢另類御妻之道，權權話自己有兩個秘訣，一就係如果妻子通訊程式換咗頭像，佢就會趕快返屋企交人，權權笑言：「如果個頭像令人感到有一股寒氣，咁樣就會即刻趕返屋企。」至於第二點就係老婆冇轉膊頭，權權話如果瞓覺時，當隻手掂到老婆嘅膊頭，如果係又冷又硬，咁即係代表老婆超級生氣，所以呢個時候權權就要乖乖去瞓覺。

另外，拍劇拍戲不斷嘅成東日就解釋自己點解咁搏命搵錢，原來係因為佢私生子身份，佢話因為自己係私生子關係，所以當佢遇到太太兼成為三子女嘅父親時，佢就好珍惜呢個家庭，所以佢會努力搵錢來養家，為屋企帶來更大嘅幸福。

更多韓流，喺晒《娛果》
http://fb.com/appledailyent