（上文提要：我把盤踞於馬場三樓的遊魂都趕去陰間，以為一切已擺平，牆上一個早已荒廢多年的電話卻響起來。）

「鈴鈴鈴……」李博來嚇得不敢去接電話，它自然繼續響着。

「喬……喬律師，不如你聽咗個電話佢吖……」李博來一臉懇求的樣子，在我看來分外討厭。

「會唔會係你個嘢壞咗呀？我睇唔到嗰邊有靈體喎，你過去接咗先啦，我又唔係你哋職員。」我托着下巴問，畢竟單從靈力上看，那部電話並沒有任何異常。

「真係無事？」李博來半信半疑地看着我道：「一陣我畀人懾……懾咗靈魂點算？」

見證着他短時間內由不信鬼神，到現在用起靈界的術語，還是挺有趣的。我笑道：「靈體透過電話害人只係電影橋段，你放心聽啦。」

李博來不情願地走到那邊，拿起電話筒放到耳邊，說了幾句之後，本來繃緊的面容卻愈見放鬆，最後還笑着掛上電話。

我見他一臉輕鬆的樣子，便走過去問：「咦，有乜咁好傾呀？」

「原來係打嚟搵老公，」李博來忍俊不禁，笑道：「我哋office有條友兩晚無返屋企瞓，畀佢老婆打到嚟公司刮人呀。」

我順着問：「佢咩人嚟㗎，私事搞到返公司？」

「佢叫鄭明，同我差唔多時間入職，但咁耐都無點升過，」李博來略帶不屑地說：「呢一年仲要成日唔知去咗邊，三日唔埋就sick leave甚至射波。」

「哦？」我倒是聽出了點趣味來：「咁你使唔使去話返畀阿鄭生知？一陣佢老婆殺上嚟，粒花生就大啦。」

雖說靈體不能靠電話害人，但沒連線的電話，正常人又怎能打得通？而且還指名道姓找一個大活人？李博來注意不到當中問題，我也不說明白，免得他又膽怯起來拖我後腿。

我跟着李博來走到會客室，着人到辦公室把那個鄭明叫過來。不一會，就有一個滿臉烏氣、頭頂半禿的胖子推門進來。

「李經理，搵我有咩事？」那人面有懦色地問：「係咪……我有咩做得唔好？」

看來他便是鄭明，他這樣說，應該是對自己經常請假的事心虛吧。不過我看出了更多東西，便搶在李博來前開口道：「鄭先生係咪？你呢排係咪成日都夢遊？」

「你……你點知㗎？」鄭明這下才留意到我的存在，轉過來問：「請問你係……？」

「呢位係喬楚律師，」李博來指着我道：「放心，唔係咩大事，只係想你多啲關心吓老婆。」

「老……老婆？」鄭明不明所以問：「經理，我唔係好明你講乜。」

「你老婆啱啱打嚟搵你，話你兩晚無返屋企瞓呀，」李博來笑着道：「嗱，大家男人，我都明嘅，但玩還玩，唔好玩到屋企都唔返吖，一陣搞到你老婆殺上嚟就……」

「喂喂喂咪住！」鄭明推着手打斷李博來的話：「咩老婆呀？唔好拎呢啲嘢講笑啦，我之前衰爛滾，阿菁……阿菁佢走咗好多年啦……」

「吓？佢又識打上嚟？」李博來仍不知情識趣，自顧道：「咁或者佢想跟返你呢？」

「呀經理，鄭先生意思係話佢老婆過咗身。」我不好意思地提醒了他。

「呃……」李博來僵在那裡，一時之間也不知怎樣打完場。

「鈴鈴鈴鈴……」會客室內的電話不合時宜地響起，把李博來和鄭明都嚇得直跳了起來。

房內的氣氛瞬間跌至冰點，除了長響的鈴聲，誰也說不出話來。

（待續）

頭盔：本故事純屬虛構，如有雷同，實屬巧合。

沙田馬場深夜的買馬人龍（一） | 說書人阿域
https://hk.news.appledaily.......e/article/20180310/57925684

沙田馬場深夜的買馬人龍（二） | 說書人阿域
https://hk.news.appledaily.com/district/realtime/article/20180317/57959968

沙田馬場深夜的買馬人龍（三） | 說書人阿域
https://hk.news.appledaily.com/district/realtime/article/20180324/57988852

專欄作者簡介：
說書人阿域
網絡小說作家、音樂人，出版作品《我做電話投注，每晚都會接到同一個女人來電》。

Facebook專頁：
https://www.facebook.com/atvolunteer/