頭三場都是由換人策騎之馬勝出，第三場五班1800米，韋達同潘頓都騎過之徐廐馬「故事」，今次換上季內首次操刀之毛里裘斯籍騎師田泰安，行運醫生醫病尾，12檔出閘迅速切入，沿途前置跑主動，結果氣走放頭馬「課課快」，四歲愛爾蘭馬在港苦戰三季共24場，卒之爆13倍冷W開齋，田泰安與徐雨石今季兩次合作贏馬都係谷草。
今場賽果冷過天氣，事關跑第二之「課課快」係177倍冷門，此馬次次跑親都係大冷門兼大敗，呢鋪加程初跑千八米，李寶利沿途撳住嚟放，就咁殺入一席322.5元大冷位置派彩，加埋第三名「公証揚聖」亦係24倍冷門，呢場Q、T分別派八千四百幾蚊同超過十萬蚊。