超人李嘉誠一向係長和系嘅靈魂人物，之但係，噚日長和（001）舉行周年股東會，竟然有9.8%小股東反對超人重選為董事，雖然比例細，不足以否決呢項議案，但有近一成小股東唔like超人，呢件事可大可小喎，唔知超人會唔會變嬲嬲豬，即刻搵人走去查察邊啲小股東投反對票呢？
其實小股東唔只反對超人連任，其他董事都有同類情況，好似超人嘅得力助手周胡慕芳、陸法蘭、葉德銓，有「長江一號」之稱嘅非執董李業廣，都有大約3成小股東投票反對佢哋重選為董事，「打工皇帝」霍建寧嘅反對數目少啲，亦有7.4%。小超人李澤鉅噚日就唔使重選。
今次係長和與和黃（已除牌）進行世紀重組後首次舉行股東會，超人一直話重組為股東，但小股東噚日投反對票，似係有話兒喎。