噚日其中兩間聲稱交咗定金但又收唔到錢嘅製作公司代表:浙江世紀風采文化傳播有限公司董事長祝偉民同深圳稻草文化傳播有限公司代表嚴嫺,以及自稱係北京天星文化娛樂有限公司前總經理沈詩儀(沈曉力),喺尖沙嘴美麗華酒店舉行記者會,仲話要真相大揭發。
沈詩儀強調04年由陳柳泉(即陳淑芬丈夫)委任為公司總經理,由《雪狼湖》開始做,仲拎咗好多文件同相片出嚟證明自己係認識陳淑芬夫婦,同埋曾經喺呢間公司做嘢。佢話今次學友嘅內地個唱,佢有同其他同事由私人戶口收取嘅定金,但戶口銀行卡同密碼自己都冇操控權,係由陳淑芬夫婦操作,佢指陳太喺佢不知情下,將戶口入面1,700萬,轉入另一個人戶口。佢仲聲淚俱下讀出一封「致張學友大哥的公開信」,叫學友關注呢件事。但記者會完咗,佢匆匆離開,唔肯再接受記者發問。
另外,世紀風采嘅祝偉民,話之前畀咗1,000萬人民幣,作為申辦學友演唱會定金,但最後搞唔成,仲有300萬未收番。佢話:「儍瓜才不收。」佢話會追討到底,家交由北京法院審理。