吳日言（Yan）同男友Barry拍拖17年，喺前年10月去咗日本沖繩註冊結婚，仲俾人見到佢哋影婚紗相。開心事唔怕講，Yan之後都有宣佈：「我已經做咗人妻喇！」（新聞連結： http://bit.ly/2AIw7ui ）

喺日本婚禮時只係邀請咗約30人，全部係親戚同舊同學，冇通知過圈中人。Yan喺今晚就補擺咗婚禮，Yan着住紅色低胸長裙非常性感，席上賓客就有啱啱求婚成功嘅江若琳同蕭潤邦（Oscar），兩個分別影相同拍片，分享呢件喜事，見到Yan繞住老公，仲鬼馬咁向鏡頭飛吻。

Yan回覆《蘋果》話為咗今晚籌備咗7個月，喺中環梅夫人婦女會擺咗十圍，大部份都係請親戚朋友，其他只係請咗Oscar、江若琳、以前商台DJ Leo同茜利妹，Yan覺得呢個地方好特別，覺得好啱佢同老公，歷史悠久有細水長流嘅感覺。不過今晚佢就冇着裙褂，只係揀咗件紅色晚禮服，本來只係諗住私人宴會，但就俾Oscar擺咗相出嚟。

Yan又話今晚冇乜儀式，好簡單，賓客都係爸爸啲朋友，好多都睇住佢大，要7個月時間籌備係因為申請場地要先做會員，會有外國人interview，過程令佢相當緊張，佢話連見工都未試過全英文，笑言好彩終於都pass咗。Yan又話o依家努力造人，希望等百日宴再請多啲朋友，因為真係好多人催佢生BB，嚟近會去北海度蜜月，不過都係同成班朋友……咁咪好難造人？

江若琳同蕭潤邦今年底都會共諧連理，問佢係咪偷師，江若琳哈哈哈咁回覆：「今年勁多朋友結婚呀！」而Oscar貼出一張高炒相，令吳日言爆乳身材呼之欲出，問到Oscar幾時輪到佢結婚，係咪都會畀江若琳咁着同咁同賓客合照？佢笑言：「呢排去朋友飲宴，我都睇緊啲尺度，但我真係有諗過佢套婚紗係樽領，懷舊款式呀。」

最港電影大獎投票網址
http://bit.ly/thekongestfilmawards

精選娛聞，喺晒《娛果》
http://fb.com/appledailyent