（好開心呀，今日爹哋媽咪帶我去將軍澳玩，有得見班靚靚哥哥姐姐，UncleWong仲送咗部iPadNano畀我，Yeah，聽日可以帶返學校威威）

「英仔，仲掛住玩？夠鐘出場咯噃，記唔記得台詞呀？」「老公放心啦，仲緊張過個仔！」「我擔心佢亂講吖嘛。」「唔緊要啦，呢度唔怕。」

（化妝姐姐幫我喺面上畫幾筆，服裝哥哥就幫我着上小禮服。嘻嘻，梗係爹哋唔抵得我靚仔過佢咁多，嬲嬲豬！喂唔講住，輪到我）

芷晴：跟住落嚟嘅嘉賓犀利囉！
吹波波：我知，佢同你一樣，都係星二代吖嘛！
芷晴：祖藍話囝囝會上台表演吹水。
吹波波：究竟係吹水吖，定係吹口水波，定係祖藍吹水呢？我好亂。
芷晴：吹夠未呀，呢度又唔係你舊公司！請用熱烈掌聲歡迎王維英小DiDi！

（吹哥哥口水仲多過爹哋。搞錯，要人喺後台企成分鐘，有啲想尿尿添）

「大家好，我叫王維英，今年9歲。首先，要多謝吹哥哥，多謝你終於捨得放低個咪。」（台下傳來恥笑聲）「爹哋媽咪原本預備咗啲恭賀說話，想我讀畀大家聽，但我扭計，因為爹哋媽咪唔代表我！」（台下哄動）「今日，我可以同大家講happybirthday，其實最多謝兩個人。呢兩個人，並唔係爹哋同媽咪。」（台下觀眾你眼望我眼，議論紛紛）「10年前今日，即係2014年11月19日，HKTV開台。雖然我未出世，但聽番Uncle、Auntie講，嗰時好大陣仗。我知道，當年仲有TVB同唔知乜東東電視台，而我爹哋媽咪就係幫TVB打工。大家都知爹哋平時幾盡忠職守啦，睇住公司有難，唔通唔幫咩！於是，爹哋諗到條屎橋，就係當晚喺公司直播節目度，扮即興同媽咪求婚呃收視。媽咪畀爹哋同公司擺上枱，想唔應承都唔得。」（台下再起哄）「而我，就係咁嚟到呢個世界。所以，第一個要多謝嘅人，就係台下嘅UncleWong！」（掌聲雷動，鏡頭pan向UncleWong）「HKTV俾壞人蝦，本來應該玩完。但UncleWong為夢想堅持，結果成功開到台，又搞到TVB亂晒龍，迫爹哋出動到求婚呢招。」（UncleSo起立，向UncleWong致敬）「至於第二個人……雖然佢好唔受歡迎，亦唔知佢去咗邊樹，但都要多謝佢……」

（吹哥哥突然衝上台，好似想搶咪，媽呀，好驚驚。好彩，芷晴姐姐及時制止。）「呢個就係一男子！冇佢喺度搞屎棍，HKTV就唔會壯大，亦唔會有咁多人支持。大家依家應該知點解我唔叫維穩、維園、圍蘋定唯唯，而係維英啦！」（我都話我叻叻，睇吓觀眾啲反應！咦咦咦，輪到爹哋攞尾彩）

祖藍：衰仔，吖你唔講嗰句都講埋喎！嘻嘻嘻，我喺呢度先恭祝HKTVHappyBirthday先！因為冇HKTV，我同老婆都冇今日！而為咗答謝HKTV當年肯收留我哋兩公婆，我決定喺10周年台慶呢個重大日子，再畀多個驚喜大家！」（爹哋推着大肚如籮嘅媽咪上台）
祖藍：醫生，手術刀準備好未？Cameraman，唔該鏡頭pan落個肚度……

完

撰文：杜秋棠＠抽水站
https://www.fb.com/freakingwestlook