近排港股好似坐過山車咁，忽高忽低，好似前日，恒指一開市就跌咗百幾點，諗住連升咗6日要回吓氣，點知唞咗十分鐘又升過，仲升上歷史新高，以為呢吓回氣來勢洶洶，點知收市倒跌百七點。做旁觀者睇到呢啲場面，就梗係呱呱叫話刺激；但人在市中，真係少啲心血都俾佢嚇窒。

有個朋友話，呢啲市況忍手唔炒，睇住個市升覺得唔抵，但震多兩震，就食幾多驚風散都唔夠定驚，問敏妮喺呢啲市況應該點炒好？
家陣市面上有好多金融衍生工具，就好似時裝咁，唔同服飾可以配合唔同嘅場合。以𠵱家呢個市況，就可以學人玩吓馬鞍式期權。炒輪大家都應該唔多陌生，call輪、put輪點玩，睇怕都唔使敏妮多講；其實馬鞍式期權有啲相似，都係買call同put，如果正股升，買call就有錢賺，而put嘅就唔值錢。

相反如果正股跌，買put賺，買call就要蝕。由於無論call同put蝕盡都係期權金，相反賺就視乎升/跌幅度，理論上可以無限，所以只要正股波幅夠大，就可以抵銷到輸咗嘅期權金。
以玩恒指期權為例，玩法係同時買入同樣行使價嘅calloption同putoption，以一隻7月底同期，以恒指21800點為指標嘅恒指期權，噚日恒指報21803點，隻認購期權就報579點、認沽期權報488點，以每點50蚊計，買晒兩隻要五萬幾蚊（1067x50蚊）。呢款馬鞍式期權上下打和點係20733點（21800-1067）同22867點（21800+1067）。只要恒指升破22867或者跌穿20733嘅話，就有錢賺。
雖然話要升或者跌成千點先有得賺，但恒指由6月8日低位20509點，升到去6月22日，差1點就破22000點大關，升咗1491點。所以6月份如果有玩呢個遊戲，你已經有錢落袋。

仲有，由於call同put此消彼長嘅關係，所以馬鞍式期權有另一個好處──就係唔會輸入肉，即係點都唔會輸晒五萬幾蚊本錢。
http://manlitalk.com/blogs/