主席又剃人頭喇，邊位主席？之唔係僱員再培訓局（erb)主席梁永祥囉。自從佢今年4月幫街坊飛髮後，唔知係技癢抑或真係愛上咗呢門手藝，佢今日出席erb美髮活動日時，再次落場大顯身手。上次手震震嘅佢話喎，呢次相當有信心，唔知係咪呢幾個月有秘密特訓呢？雖然佢剪之前都大叫緊張，不過呢次就無上次幫街坊剪髮咁手都震埋喇。

主席剪完髮後，亦不忘宣傳7月起開始嘅「全民愛增值」活動，佢話活動去到9月都進入倒數階段，但去到月底前都仲好歡迎15歲以上、副學士學歷以下嘅市民報讀，參加者可以免費讀一個課程。主席仲話睇到多咗男學員報讀課程，而且有接近400個課程俾大家揀，各行各業課程都有，佢希望各位市民把握最後機會報名參加啊。

而獲主席親自幫忙剪髮嘅erb學員林新興，本身髮型似政務司司長張建宗，佢原來啱啱讀完兩個造麵包課程，對於主席嘅手勢，佢就豎起兩隻姆指話「好舒服，專業嚟講，有90分喇，但主席係業餘，就攞足100分。」佢又話，課程幫到佢轉型投身飲食業，本身患病嘅佢希望病好後可以做麵包師傅。

而服務日其中一位義工Mary姐仲專登從元朗出嚟幫石籬街坊飛髮。本身兼職做形象設計嘅佢話自己讀完美髮課程後，最開心係可以做義工幫屋企人同老人家剪頭髮。佢仲話自己三個仔女都對佢手勢相當滿意，佢哋好耐無試過出去剪頭髮㖭！

被Mary姐操刀剪頭髮嘅10歲小妹妹思穎，亦似乎好欣賞Mary手勢，除咗點頭話滿意外，仲話第日大個都想做髮型師。不過Mary就笑笑口評自己「70分喇，謙虛啲好。」

erb嚟緊19號仲有一個按摩服務日，到時會有10位合資格學員幫100位入住安老院嘅老人家按摩，唔知到時主席會唔會又落場呢？